क्यानाडाले अन्तर्राष्ट्रिय विद्यार्थीलाई हप्तामा २० घण्टा भन्दा बढी क्याम्पस बाहिर काम गर्न अनुमति दिने

Listen to this article

काठमाडौँ : क्यानाडा सरकारले अन्तर्राष्ट्रिय विद्यार्थीहरुलाई हप्तामा २० घण्टा भन्दा बढी क्याम्पस बाहिर काम गर्न अनुमति दिने निर्णय गरेको छ।

रोजगारदाताहरूले आर्थिक सुधार र वृद्धिको यस अवधिमा आफूलाई आवश्यक पर्ने कामदारहरू फेला पार्न र कायम राख्नमा अभूतपूर्व चुनौतीहरूको सामना गरिरहेका बेला क्यानाडा सरकारले वर्तमान श्रम आवश्यकताहरू सम्बोधन गर्न सो निर्णय गरिएको बताइएको छ। नयाँ नीति अनुसार आगामी नोभेम्बर १५, २०२२ देखि डिसेम्बर ३१, २०२३ सम्म, क्यानाडामा रहेका अन्तर्राष्ट्रिय विद्यार्थीहरू जसले अध्ययन अनुमतिमा क्याम्पस बाहिर काम पाएका छन् उनीहरूलाई कक्षाको सत्रमा क्याम्पस बाहिर प्रति हप्ता २० घण्टा भन्दा बढी काम गर्न अनुमति दिइनेछ। विदेशी नागरिकहरू जसले पहिले नै अध्ययन अनुमति आवेदन पेश गरिसकेका छन्, तिनीहरूको आवेदन स्वीकृत भएमा, यो अस्थायी परिवर्तनबाट लाभान्वित हुने छन्। यो नीतिले धेरै अन्तर्राष्ट्रिय विद्यार्थीहरूलाई क्यानाडामा कार्य अनुभव प्राप्त गर्ने ठूलो अवसर प्रदान गर्ने क्यानाडा सरकारको ठहर छ। यसले क्यानाडाको महामारीपछिको आर्थिक वृद्धिलाई कायम राख्न कामदारको उपलब्धता बढाउने विश्वास गरिएको छ। क्यानाडाको बेरोजगारी दर सेप्टेम्बरमा ५.२ प्रतिशतमा झरेको छ, जुन अगस्टमा ५.४ प्रतिशत रहेको त्यहाँका अधिकारीको भनाइ छ।  क्यानाडा अन्तर्राष्ट्रिय विद्यार्थीहरूको विश्वको प्रमुख गन्तव्यहरू मध्ये एक हो। २०२१ मा ६,२०,००० अन्तर्राष्ट्रिय विद्यार्थीहरू उच्च शिक्षाका लागि क्यानाडा पुगेको तथ्यांकले जनाएको छ , जुन संख्या विगत दुई दशकहरूमा तीन गुणा बढेको देखिन्छ। क्यानडाले यो वर्ष अगष्टसम्म मात्रै झण्डै ४५०,००० नयाँ अध्ययन अनुमति जारी गरेको थियो।